Сауран: Республикалық және Азия чемпионаттарында жеңіске жеткен оқушыларды аудан әкімі құттықтады

Қарағанды қаласында өткен Қазақстан Республикасының «64» дойбыдан чемпионатында ауданымыздың жас спортшылары үлкен жетістіктерге жетіп, жүлделі орындарды иеленді. Ұлдар мен қыздар арасында ұйымдастырылған чемпионатта оқушыларымыз екі І — орын, екі ІІ — орын және бес ІІІ — орынды жеңіп алып, ауданымыздың атын шығарып, спорттағы жетістіктерімен мақтанышты болды.

Осы жетістіктерін атап өту үшін, аудан әкімі Мақсат Таңғатаров жеңімпаз оқушыларды арнайы қабылдап, олармен кездесіп, құттықтау сөзін айтты. Әрбір жеңімпазға алғыс хаттар табыстап, олардың болашақтағы жетістіктеріне сенім білдірді. Аудан әкімі дойбыдан жеңіске жеткен оқушылардың табыстары ауданның спорттық дамуына зор үлес қосып, жас спортшыларға үлгі болатынын атап өтті.

Сонымен қатар, оқушыларымыз Өзбекстан Республикасы Ташкент қаласында өткен Азия чемпионатында да жүлделі жеңістерге жетіп, «100» және «64» дойбыдан ересектер, жастар, жасөспірімдер, ұлдар мен қыздар арасында Абдулла Арман  III-орынға ие болды. Бұл халықаралық деңгейдегі жетістік ауданымыздың спортшыларын жаңа белестерге жетелеуге зор ықпал етті.

Өткен жылы Ташкент қаласында өткен «64» дойбыдан Әлем Кубогында 14 жасар Құдайберген Нұрасыл мен Абдулла Арман І орынға ие болып, елімізді әлемдік аренада тағы да жоғары деңгейде танытты.

Аудан әкімі Мақсат Таңғатаров спортшыларды құттықтап қана қоймай, олардың ұстаздарына да шынайы алғысын білдірді. Ол ұстаздардың еңбегі мен біліктілігінің арқасында оқушыларымыз осындай жетістіктерге жетіп отырғанын айтып, педагогтердің спорт саласындағы маңызды рөлін ерекше атап өтті.

Бұл жеңістер тек оқушыларымыздың ғана жетістігі емес, сондай-ақ, ауданымыздағы спорттың дамуына, жас ұрпақтың салауатты өмір салтына деген ынтасын арттыруға зор ықпал ететін маңызды қадамдар болып табылады. Аудан әкімі болашақта да осындай жетістіктердің молайып, жастарымыздың әлемдік деңгейде өз орнын табуына тілектестігін білдірді.