Алматы облысында 19 млн теңге комикстерге жұмсалмақ

 Алматы облысының дін істері басқармасы 19,7 млн теңгеге «дәстүрлі құндылықтарды насихаттау» және «экстремизмнің алдын алу» мақсатында анимациялық комикстер әзірлетпек, деп хабарлайды Алматыдағы BAQ.KZ тілшісі.

Мемлекеттік сатып алу порталында жарияланған бұл жоба қоғамда түрлі пікір туғызып жатыр. 

Жоба аясында:

• Қазақ және орыс тілдерінде кемінде 10 анимациялық комикс әзірленбек;
  • Әр комикс кемінде 15 беттен тұруы керек;
  • Барлығы 1000 данадан кем емес таралыммен басылып шығады;
  • Сондай-ақ видеокомикс форматында 10 шығарылым әзірленеді.

Алматы облысы әкімдігінің баспасөз қызметі жобаның маңызын былайша түсіндіреді.

Жоба дәстүрлі құндылықтарды насихаттауға және экстремизмге қарсы іс-қимыл жасауға бағытталған, жастардың сыни ойлау, медиа сауаттылық және ұлттық бірегейлігін дамытуға басымдық береді. Ақпараттық-цифрлық материалдарды әзірлеуге 19 701 000 теңге қарастырылған. Бұл сома нарықтағы баға мен шығындарды егжей-тегжейлі талдау арқылы негізделді. Жоба дәстүрлі құндылықтарды насихаттауға және экстремизмге қарсы тұруға бағытталған. Ол медиа сауаттылықты, ұлттық бірегейлікті дамытуға ықпал етеді, – делінген ресми түсініктемеде.

Әкімдіктің мәліметінше, 2024 жылы жүргізілген әлеуметтік зерттеулерге сәйкес, өңірдегі кәмелетке толмағандардың 55%-дан астамы діни сенімге ие, ал шамамен 35%-ы діни ақпаратты интернет арқылы алады. Осыған байланысты жасөспірімдерді онлайн кеңістіктегі деструктивті контенттен қорғау – басты міндеттердің бірі ретінде айқындалған.

Жоба ұлттық бірегейлік пен рухани құндылықтарды бекітіп қана қоймай, жас буынның медиасауаттылығын қалыптастыруға бағытталған. Жоба 2025 жылдың соңына дейін аяқталуы тиіс.