2025 жылғы 2 қыркүйектен бастап Алматыда заманауи электроавтобустар қызмет көрсететін жаңа №90 автобус бағыты жұмысын бастайды.
Қалалық мобильділік басқармасының мәліметінше, №90 бағыттағы автобус Абай даңғылы бойымен – К.Медеубеков көшесінен Республика сарайына дейін қатынайды.
Бұл жаңа бағыт Наурызбай ауданындағы Қалқаман және Шұғыла шағынаудандары тұрғындарының қатынасын жеңілдетеді.
– Бағытта ұзындығы 12 метрлік «Golden Dragon» маркалы электроавтобустар қызмет көрсетеді. Олар дыбыссыз жүріп, салқындатқыштармен, бейнебақылау камераларымен, USB-ұяшықтарымен, жүргізушіні қадағалау жүйелерімен және өзге де заманауи құралдармен жабдықталған, — деп хабарлады басқарма.
Жолаушыларды «Алматыэлектротранс» коммуналдық кәсіпорны тасымалдайды.
Күн сайын жолға 25 автобус шығып, қозғалыс аралығы 4 минут болады.
Еске салайық, бұған дейін 2025 жылғы қыркүйектен бастап Қазақстан мен Қырғызстан «Кеген» бақылау-өткізу бекеті арқылы Қаракөл-Алматы-Қаракөл бағыты бойынша халықаралық автобус бағытын қалпына келтіретінін жазғанбыз.