Түркістан облысы Қазақстандағы туризм қарқынды дамып келе жатқан өңірлердің біріне айналып отыр. Соңғы жылдары тарихи-мәдени мұраны жаңғырту, инфрақұрылымды жетілдіру, халықаралық деңгейдегі туристік жобаларды іске асыру және сервистік қызмет сапасын арттыру бағытында атқарылған жұмыстардың нәтижесінде өңірге келушілер саны тұрақты өсуде. Биылғы жылдың алғашқы бес айының қорытындысы да осы оң үрдісті айқын көрсетіп отыр.
Түркістан облысы әкімдігінде өткен жиында туризм саласының дамуы жан-жақты сараланып, негізгі көрсеткіштер мен алдағы жоспарлар талқыланды. Мәліметке сәйкес, 2026 жылдың қаңтар-мамыр айлары аралығында облысқа 143 100 турист келген. Бұл өткен жылдың сәйкес кезеңімен салыстырғанда 15,6 пайызға жоғары көрсеткіш. Оның ішінде 111 мыңнан астамы – еліміздің өзге өңірлерінен келген отандық саяхатшылар болса, 31 823 адамды шетелдік туристер құрады. Шетелдік қонақтар санының бір жыл ішінде 34,2 пайызға артуы Түркістанның халықаралық туристік бағыт ретінде танымалдығы артып келе жатқанын аңғартады.
Облыс әкімі Нұралхан Көшеровтің төрағалығымен өткен жиында туризмнің өңір экономикасының маңызды қозғаушы күшіне айналғаны атап өтілді. Аймақ басшысы жауапты басқармаларға туристік қызмет көрсету сапасын жаңа деңгейге көтеру, жаңа туристік бағыттарды қалыптастыру және инвестициялық жобаларды мерзімінде жүзеге асыру бойынша нақты тапсырмалар жүктеді.
– Туризм – экономиканың басым салаларының бірі. Сондықтан туристік нысандардағы сервисті халықаралық талаптарға сәйкестендіріп, гидтердің кәсіби даярлығын күшейту, туристік әлеуетті елімізде ғана емес, шетелде де кеңінен насихаттау қажет. Цифрлық платформалардың мүмкіндігін тиімді пайдалану арқылы Түркістанның халықаралық туристік имиджін нығайту маңызды, – деді облыс әкімі.
Жиында «Open Turkistan» туристік ақпараттық орталығының директоры Асқар Абубакиров өңірдегі туризм көрсеткіштері туралы баяндама жасады. Оның айтуынша, Түркістанға келген шетелдік саяхатшылардың басым бөлігі Өзбекстан, Қытай, Түркия, Ресей, Қырғызстан, Германия, Франция, Ұлыбритания, Жапония және Оңтүстік Кореядан келген. Бұл елдермен туристік байланыстардың кеңеюі Түркістанның халықаралық деңгейдегі тартымды бағытқа айналып келе жатқанын дәлелдейді.
Өңірде тек тарихи-мәдени туризм ғана емес, табиғи және экологиялық туризм де қарқын алып келеді. Биыл алғашқы бес айда ерекше қорғалатын табиғи аумақтар мен демалыс орындарына 60 100 адам келіп, бұл көрсеткіш өткен жылмен салыстырғанда 2,1 пайызға өсті. Ақсу-Жабағылы мемлекеттік табиғи қорығы, «Сайрам-Өгем» ұлттық табиғи паркі, Қасқасу, Біркөлік және Сайрамсу шатқалдары туристер арасында ерекше сұранысқа ие бағыттардың қатарында.
Туризм саласына тартылған инвестиция көлемі де айтарлықтай ұлғайған. Есепті кезеңде бұл көрсеткіш 36,3 миллиард теңгені құрап, өткен жылдың сәйкес кезеңімен салыстырғанда екі есеге жуық өскен. Қазіргі таңда облыста қонақүйлер, демалыс орындары, экотуризм кешендері мен ойын-сауық инфрақұрылымын дамытуға бағытталған бірнеше ірі инвестициялық жоба жүзеге асырылып жатыр.
Сонымен қатар облыста туристерге қызмет көрсететін инфрақұрылым жүйелі түрде кеңейіп келеді. Бүгінде өңірде 11 туроператор, 45 туристік агенттік және 43 сертификатталған гид жұмыс істейді. Мамандардың кәсіби біліктілігін арттыру, бірыңғай ақпараттық жүйе құру және туристерге арналған цифрлық чат-бот әзірлеу жұмыстары жүргізілуде.
Көлік қатынасының дамуы да туристер ағынының артуына оң әсерін тигізуде. Түркістан халықаралық әуежайы арқылы қазіргі уақытта тоғыз бағыт бойынша тұрақты рейстер орындалады. Оның жетеуі – ішкі, екеуі – халықаралық бағыттар. Бұл өңірдің көлік қолжетімділігін арттырып, шетелдік қонақтардың келуіне қолайлы жағдай жасап отыр.
Соңғы жылдары оқиғалық туризмге де ерекше назар аударылуда. Жыл басынан бері Түркістан облысында 50-ден астам халықаралық және республикалық деңгейдегі мәдени-көпшілік іс-шара ұйымдастырылып, оған шамамен 100 мың адам қатысты. Олардың қатарында Turkistan Night Run халықаралық жарысы, Ethno Fashion Show, қолөнершілер көрмелері, TEDx Turkistan конференциясы, халықаралық бизнес форумдар мен түрлі шеберлік сабақтары бар.
Мамандардың пікірінше, Түркістанның тарихи мұрасы, қасиетті орындары, табиғи ландшафтары және жаңа туристік инфрақұрылымы өңірдің әлеуетін жылдан-жылға арттыра түсуде. Қазіргі таңда халықаралық стандарттарға сай қонақүй кешендері, демалыс орындары, экскурсиялық бағыттар мен сервистік қызметтердің көбеюі облыстың туристік тартымдылығын күшейтіп отыр.
Жалпы, алғашқы бес айдағы нәтижелер Түркістан облысының туризм саласы тұрақты даму кезеңіне өткенін көрсетеді. Инвестиция көлемінің артуы, шетелдік туристер санының көбеюі, жаңа туристік жобалардың іске асырылуы және қызмет көрсету сапасының жақсаруы алдағы уақытта өңірдің Қазақстандағы ғана емес, Орталық Азиядағы жетекші туристік орталықтардың біріне айналуына негіз қалайды.