25 тамызда Оқушылардың инновациялық шығармашылық орталығында педагог-психологтердің қалалық тамыз кеңесі өтті.
Кездесудің басты тақырыбы — «Балалардың психологиялық әл-ауқаты: стратегия және автоматтандыру». Іс-шара Алматы қаласы Психологиялық қолдау орталығы директоры В.С. Коканованың модераторлығымен өтті.
Психологиялық климатты жүйелі түрде мониторингтеу және тәрбиеленушілер арасындағы буллингке қарсы тұру үшін қатысушылар тәжірибеде «Stop Bullying» технологиялық экожүйесі мен «ДосболLike» бағдарламасының құралдары сияқты озық шешімдерді қолдана алады. Психологтерді дағдарыстық жағдайларда шұғыл әрекет етуге арналған нақты нұсқаулармен қамтамасыз ететін, суицидтік мінез-құлықтың превенциясы мен поственциясы саласында кәмелетке толмағандармен жұмыс істеу алгоритмдерін егжей-тегжейлі пысықтау маңызды жаңалық болды.
Сонымен қатар, мамандар оқу процесіне «Жеке қауіпсіздік» курсын енгізу ерекшеліктеріне қатысты толық түсініктемелер алды. Ерекше назар аударуды қажет ететін балаларды кешенді психологиялық-педагогикалық сүйемелдеуді қамтамасыз ету мақсатында отбасыларды өмірлік қиын жағдайлардан шығару қағидаттары зерделенді. Мамандарға күнделікті құжат айналымын, есептілікті және деректер матрицаларын қазіргі заманғы әкімшілік талаптарға қатаң сәйкестендіруге мүмкіндік беретін өзекті нормативтік-құқықтық базаны талқылау да маңызды тәжірибелік қорытынды болды.
Кеңес қатысушылары алдағы оқу жылына арналған жаңа әдістемелік ұсынымдарды бекітті. Шара соңында қаланың психологиялық қызметін дамытуға қосқан үлесі үшін үздік мамандарды салтанатты түрде марапаттау рәсімі өтті.
Тамыз кеңесі – 2026: Алматыда балалардың психологиялық әл-ауқаты туралы талқыланды
