Шымкент қаласы мәслихатының хатшысы Бахадыр Нарымбетов Нұрсәт шағын ауданындағы №130 көпқабатты үйдің тұрғындарымен кездесті. Бұған дейін олар мәслихатқа базынасын айтып шағымданған болатын. Мәслихат хатшысы Бахадыр Мәдәліұлы тұрғындардың талап-тілегін бірден назарға алып, мәселенің мән-жайын зерделеді.
Шымкент қаласы Қаратау ауданы аумағындағы орналасқан 9 қабатты тұрғын үй 2012 жылы салынып, 2014 жылы «Еңбек» мемлекеттік бағдарламасы арқылы пайдалануға берілген.
Қазіргі таңда тұрғын үй толығымен қайта жөндеу жұмыстарын қажет етуде. Яғни жауын- шашын болған күні шатырдан аққан су үйдің ішіне құйылады. Сорғалап аққан су пәтерлерден өтіп жер төлеге дейін барады, — дейді ашынған тұрғындар.
Халықтың базынасын тыңдаған мәслихат хатшысы аталған мәселенің «Nur Otan» партиясы «Өзгерістер жолы: Әр азаматқа лайықты өмір» атты Шымкент қаласы бойынша 2021-2025 жылдарға арналған сайлауалды бағдарламасын іске асыру мақсатында дайындалған «Жол картасы» аясында қаралатындығын айтты.
Мәслихат хатшысы тұрғындарға аталған мәселенің алдағы сессияның қарауына ұсынылып, тиісті жұмыстар атқарылатындығын жеткізді.