Түркістан қаласында өрт қауіпсіздігін қамтамасыз ету және төтенше жағдайларға дайындық деңгейін арттыру мақсатында кезекті өрт-тактикалық оқу-жаттығу ұйымдастырылды. Іс-шараны Түркістан қаласы Төтенше жағдайлар басқармасына қарасты №39 мамандандырылған өрт сөндіру бөлімінің қызметкерлері өткізді.
Оқу-жаттығу Түркістан қаласындағы Б.Саттарханов даңғылы бойында орналасқан 852-кварталдағы Geely автосалоны аумағында өтті. Жаттығу барысында нысанда шартты түрде өрт шыққан жағдай модельденіп, өрт сөндірушілер мен мекеме қызметкерлерінің іс-қимылдары жан-жақты пысықталды.
Сценарийге сәйкес, автосалон ғимаратында өрт шығып, түтін таралған жағдайда алғашқы әрекет ету алгоритмдері тексерілді. Құтқарушылар оқиға орнына жедел жетіп, күш-құралдарды үйлестіру, адамдарды қауіпсіз аймаққа эвакуациялау және алғашқы өрт сөндіру жұмыстарын жүргізу бойынша машықтарын көрсетті. Сонымен қатар арнайы өрт сөндіру техникаларын пайдалану, су көздеріне қосылу және өрттің таралуына жол бермеу тәсілдері де тәжірибе жүзінде жүзеге асырылды.
Мамандардың айтуынша, автосалондар мен көлік сақтау нысандары өрт қауіпсіздігі тұрғысынан жоғары тәуекел санатына жатады. Себебі мұндай ғимараттарда жанар-жағармай материалдары, электр жүйелері және тез жанатын бөлшектер көп шоғырланады. Осыған байланысты өрт шыққан жағдайда жедел әрі үйлесімді әрекет ету аса маңызды.
Оқу-жаттығу барысында нысан қызметкерлеріне де өрт кезіндегі қауіпсіздік талаптары түсіндірілді. Атап айтқанда, алғашқы өрт сөндіру құралдарын пайдалану, эвакуациялық шығу жолдарын сақтау, адамдарды қауіпсіз жерге шығару тәртібі және төтенше жағдайда әрекет ету алгоритмдері бойынша нұсқаулықтар берілді.
Түркістан облысында соңғы жылдары өрт қауіпсіздігіне ерекше көңіл бөлініп келеді. Төтенше жағдайлар қызметі сауда орындары, өндірістік нысандар, білім беру мекемелері мен халық көп шоғырланатын ғимараттарда тұрақты түрде тактикалық жаттығулар өткізіп келеді. Мұндай іс-шаралар төтенше жағдайлардың алдын алуға және азаматтардың қауіпсіздігін қамтамасыз етуге бағытталған.
Төтенше жағдайлар басқармасының мәліметінше, оқу-жаттығудың негізгі мақсаты — өрт сөндірушілердің кәсіби даярлығын жетілдіру, төтенше жағдай кезінде жедел әрекет ету қабілетін арттыру және нысан қызметкерлерімен өзара іс-қимылды күшейту. Мамандар мұндай тәжірибелік сабақтар төтенше жағдай туындаған сәтте адам шығыны мен материалдық залалды азайтуға мүмкіндік беретінін атап өтті.