Түркістан қаласы әкімдігінде өткен кезекті аппараттық мәжілісте қала аумағындағы төтенше жағдайлардың алдын алу және тұрғындардың қауіпсіздігін қамтамасыз ету мәселелері жан-жақты қаралды. Жиынға қала әкімдігіне қарасты бөлім басшылары, құқық қорғау және төтенше жағдайлар саласының өкілдері, сондай-ақ жауапты мекеме қызметкерлері қатысты.
Күн тәртібіндегі негізгі мәселелердің бірі ретінде жазғы кезеңдегі қауіпсіздік шараларын күшейту, тұрмыстық газды пайдалану кезіндегі қауіпсіздік талаптарын сақтау, суға шомылу маусымын ұйымдастыру және балалардың терезеден құлап кетуінің алдын алу бағытындағы жұмыстар талқыланды.
Мәжілісте баяндама жасаған Түркістан қаласының Төтенше жағдайлар басқармасы бастығының міндетін уақытша атқарушы, азаматтық қорғау подполковнигі Серік Дәулетиярұлы Төлегенов аталған бағыттар бойынша атқарылып жатқан жұмыстарға тоқталды.
Баяндамашының айтуынша, жаз мезгілінің басталуымен бірге су айдындарындағы қауіпсіздік мәселесі өзекті бола түседі. Осыған байланысты қала аумағындағы өзендер, каналдар және су қоймалары маңында профилактикалық рейдтер ұйымдастырылып, тұрғындарға қауіпсіздік талаптары түсіндірілуде. Әсіресе ата-аналарға балаларды қараусыз қалдырмау, рұқсат етілмеген орындарда суға түспеу және қауіпсіздік ережелерін қатаң сақтау қажеттігі ескертілді.
Сонымен қатар, тұрмыстық газды пайдалану кезінде орын алатын төтенше жағдайлардың алдын алу мәселесіне ерекше назар аударылды. Газ жабдықтарын уақтылы тексеруден өткізу, желдету жүйелерінің жарамдылығын бақылау және қауіпсіздік талаптарын сақтау бойынша түсіндіру жұмыстары тұрақты жүргізіліп жатқаны айтылды. Мамандардың пікірінше, тұрғындардың қауіпсіздік мәдениетін арттыру арқылы газдан улану мен жарылыс жағдайларының алдын алуға болады.
Жиында көпқабатты тұрғын үйлердегі балалар қауіпсіздігі мәселесі де көтерілді. Соңғы жылдары елімізде жас балалардың терезеден құлап кету фактілері жиі тіркеліп отырғандықтан, ата-аналарға қауіпсіздік құлыптарын орнату, терезе маңына жиһаз қоймау және балаларды қараусыз қалдырмау жөнінде түсіндіру жұмыстарын күшейту қажеттігі атап өтілді.
Қала әкімі қауіпсіздік мәселелерінің тұрғындардың өмірі мен денсаулығына тікелей қатысты екенін атап өтіп, жауапты мекемелерге профилактикалық жұмыстарды жандандыру жөнінде нақты тапсырмалар берді. Сондай-ақ халық арасында ақпараттық-түсіндіру шараларын күшейтіп, қауіпсіздік талаптарының сақталуын тұрақты бақылауда ұстау қажеттігін жеткізді.
Жиын қорытындысында төтенше жағдайлардың алдын алу бағытындағы жұмыстарды жүйелі түрде жалғастыру, мемлекеттік органдардың өзара іс-қимылын күшейту және тұрғындардың қауіпсіздігін қамтамасыз ету бойынша кешенді шараларды жүзеге асыру міндеті қойылды.
Мамандардың айтуынша, қауіпсіздік талаптарын сақтау – әр азаматтың жауапкершілігі. Сондықтан тұрғындарды сақтық шараларына бейжай қарамай, төтенше жағдайлардың алдын алуға белсенді атсалысуға шақырды.