Кентау қаласында тұрғындардың қауіпсіздігін қамтамасыз ету және автокөліктердегі өрт оқиғаларының алдын алу мақсатында кең ауқымды профилактикалық іс-шара ұйымдастырылды. Іс-шараны Кентау қаласы Төтенше жағдайлар бөлімі мен қалалық жол-патрульдік полиция қызметкерлері бірлесіп өткізді.
Шара барысында газ-баллонды жабдықтармен (ГБО) жабдықталған автокөлік жүргізушілерімен түсіндіру жұмыстары жүргізіліп, газ жүйелерін пайдалану кезіндегі қауіпсіздік талаптары жан-жақты түсіндірілді. Мамандар жүргізушілерге көліктегі газ жабдықтарының техникалық жарамдылығын тұрақты бақылауда ұстау, жабдықтарды тек сертификатталған мамандарға орнату және мерзімді техникалық тексеруден өткізу қажеттігін атап өтті.
Құтқарушылардың айтуынша, газбен жүретін автокөліктерді пайдалану кезінде қауіпсіздік талаптарының сақталмауы өрттің шығуына, жарылыс қаупінің туындауына және адам өміріне қауіп төндіретін төтенше жағдайларға себеп болуы мүмкін. Сондықтан көлік иелеріне газ баллондарын пайдалану ережелерін қатаң сақтау, газдың иісі байқалған жағдайда көлікті пайдалануды дереу тоқтатып, мамандардың көмегіне жүгіну қажеттігі ескертілді.
Іс-шара аясында жүргізушілерге өрттің алдын алу шаралары, алғашқы өрт сөндіру құралдарын қолдану тәртібі және төтенше жағдай орын алған кездегі іс-қимыл алгоритмі түсіндірілді. Сонымен қатар көлік құралдарында жарамды өрт сөндіргіштің болуы, электр сымдарының жағдайын бақылау және жанар-жағармай жүйелерінің ақаусыздығын тексеру мәселелеріне ерекше назар аударылды.
Мамандар автокөлік иелеріне арнайы ақпараттық жадынамалар таратып, онда өрт қауіпсіздігі ережелері мен төтенше жағдай кезінде хабарласатын қызметтердің байланыс нөмірлері көрсетілгенін жеткізді. Сондай-ақ тұрғындарға жаз мезгілінде ауа температурасының жоғарылауына байланысты автокөліктердің техникалық жағдайын мұқият бақылаудың маңыздылығы түсіндірілді.
Кентау қаласы Төтенше жағдайлар бөлімінің қызметкерлері мұндай профилактикалық жұмыстардың негізгі мақсаты – азаматтардың қауіпсіздік мәдениетін арттыру, жол-көлік оқиғалары мен көлік құралдарындағы өрт жағдайларының алдын алу екенін атап өтті. Осы бағыттағы ақпараттық-түсіндіру шаралары алдағы уақытта да тұрақты түрде жалғасын табады.
Мамандар әрбір жүргізушіні өз көлігінің техникалық жағдайына жауапкершілікпен қарап, қауіпсіздік талаптарын қатаң сақтауға шақырады. Өйткені қарапайым сақтық шараларының өзі адам өмірін сақтап қалуға және төтенше жағдайлардың алдын алуға мүмкіндік береді.