Адам өмірі мен қауіпсіздігін қорғау жолында тәулік бойы қызмет атқаратын төтенше жағдайлар қызметкерлері тек апат орындарында ғана емес, олардың алдын алу бағытында да ауқымды жұмыстар жүргізіп келеді. Осы мақсатта Түлкібас ауданы Төтенше жағдайлар бөлімі мен аудандық Полиция бөлімінің қызметкерлері бірлесіп профилактикалық рейд ұйымдастырып, жүргізушілер арасында автокөліктегі өрт қауіпсіздігі бойынша түсіндіру жұмыстарын жүргізді.
Іс-шара барысында мамандар автокөлік иелеріне көлік құралдарындағы өрттің негізгі себептері мен оның алдын алу жолдарын түсіндірді. Құтқарушылардың айтуынша, көліктердегі өрт оқиғалары көбіне техникалық ақаулардың салдарынан, электр сымдарының қысқа тұйықталуынан, жанармай жүйесіндегі ақаулардан немесе қауіпсіздік талаптарының сақталмауынан орын алады.
Рейд кезінде жүргізушілерге көлік құралдарын уақытылы техникалық тексеруден өткізіп тұрудың маңыздылығы түсіндірілді. Сонымен қатар, көлікте жарамды өрт сөндіргіш пен алғашқы медициналық көмек қобдишасының болуы кез келген төтенше жағдайда адам өмірін сақтап қалуға көмектесетіні айтылды.
Төтенше жағдайлар қызметкерлері жүргізушілерге темекі тұқылын көлік ішінде немесе жол бойына бей-берекет тастамау қажеттігін ескертті. Себебі жаз мезгілінде құрғақ шөптердің тұтануы ірі өрттердің шығуына себеп болуы мүмкін. Сондай-ақ қозғалтқыш бөлігіндегі және электр жүйесіндегі ақауларды дер кезінде анықтап, жөндеу жұмыстарын жүргізудің маңыздылығы атап өтілді.
Құтқарушылар рейд барысында азаматтарға төтенше жағдай орын алған кездегі іс-қимыл алгоритмін де түсіндірді. Егер автокөліктен түтін шығып немесе өрт белгілері байқалса, жүргізуші көлікті дереу қауіпсіз жерге тоқтатып, қозғалтқышты сөндіріп, жолаушыларды сыртқа шығаруы қажет. Одан кейін өртті бастапқы кезеңде өрт сөндіргіштің көмегімен ауыздықтауға әрекет жасап, бір мезетте 101 немесе 112 нөмірлері арқылы шұғыл қызметтерді шақыру керек.
Мамандардың пікірінше, төтенше жағдайлардың салдарын жоюдан гөрі олардың алдын алу әлдеқайда тиімді. Сондықтан халық арасында жүргізіліп жатқан профилактикалық жұмыстардың маңызы зор. Осындай түсіндіру шаралары арқылы құтқарушылар азаматтардың қауіпсіздік мәдениетін қалыптастырып, жазатайым оқиғалардың санын азайтуға үлес қосып келеді.
Төтенше жағдайлар қызметінің мамандары күн сайын адам өмірін сақтап қалу жолында күрделі әрі жауапты міндеттерді атқарады. Олар өртпен күресіп, табиғи және техногендік сипаттағы төтенше жағдайлардың салдарын жояды, сондай-ақ тұрғындарға қауіпсіздік талаптарын түсіндіру арқылы көптеген қайғылы жағдайлардың алдын алады. Түлкібас ауданында өткізілген кезекті рейдтік іс-шара да осы жүйелі жұмыстың бір бөлігі болып табылады.
Қауіпсіздік – әр азаматтың ортақ жауапкершілігі. Ал құтқарушылардың қажырлы еңбегі мен кәсібилігі қоғамдағы қауіпсіздікті қамтамасыз етудің маңызды кепілі болып қала береді.