Жазғы шомылу маусымының басталуына байланысты Жетісай ауданында тұрғындардың қауіпсіздігін қамтамасыз етуге бағытталған кең көлемді профилактикалық іс-шаралар ұйымдастырылды. Аталған жұмыстар Жетісай аудандық Төтенше жағдайлар бөлімінің бастамасымен өткізіліп, оған Түркістан облысы Төтенше жағдайлар департаментінің жедел құтқару жасағы, жергілікті атқарушы органдар, полиция қызметкерлері, Жастар ресурстық орталығының өкілдері және бұқаралық ақпарат құралдарының мамандары қатысты.
Іс-шараның негізгі мақсаты – шомылу маусымы кезінде судағы жазатайым оқиғалардың алдын алу, тұрғындардың қауіпсіздік мәдениетін қалыптастыру және азаматтардың өмірі мен денсаулығын қорғау. Осыған байланысты аудан аумағындағы су айдындары мен демалыс орындарында түсіндіру және рейдтік жұмыстар жүргізілді.
Рейд барысында мамандар тұрғындарға судағы қауіпсіздік ережелерін жан-жақты түсіндіріп, рұқсат етілмеген орындарда шомылудың қауіптілігі туралы ескертті. Сонымен қатар балаларды су жағасында қараусыз қалдырмау, мас күйінде суға түспеу, жүзу құралдарын дұрыс пайдалану және төтенше жағдай орын алған кезде жедел әрекет ету тәртібі жөнінде кеңестер берілді.
Қауіпсіздік шаралары аясында суға түсуге қауіпті учаскелерде арнайы трафареттер арқылы «Шомылуға қатаң тыйым салынады» деген ескерту белгілері мен ақпараттық жапсырмалар орнатылды. Сондай-ақ тұрғындарға қауіпсіздік талаптары көрсетілген жадынамалар мен нұсқаулық материалдар таратылды.
Мамандар аудан аумағындағы су айдындарын зерделеп, тұрғындардың демалуына қолайлы әрі қауіпсіз орындарда жағажайлар ұйымдастыру мәселелеріне де назар аударды. Бұл бағыттағы жұмыстар азаматтардың қауіпсіз жағдайда демалуына мүмкіндік жасап, рұқсат етілмеген орындарда шомылу деректерін азайтуға бағытталған.
Төтенше жағдайлар қызметінің өкілдері жаз мезгілінде судағы қайғылы оқиғалардың басым бөлігі қауіпсіздік талаптарын елемеуден орын алатынын атап өтті. Сондықтан әрбір азаматтың өз өміріне жауапкершілікпен қарап, белгіленген ережелерді қатаң сақтауы аса маңызды.
Іс-шара барысында тұрғындарға төтенше жағдайлар туындаған кезде дереу құтқару қызметтеріне хабарласу қажеттігі түсіндірілді. Сонымен қатар қауіпсіздік талаптарын сақтау тек жеке адамның ғана емес, бүкіл қоғамның ортақ жауапкершілігі екені айтылды.
Жетісай ауданында ұйымдастырылған мұндай профилактикалық жұмыстар алдағы уақытта да жалғасады. Құтқарушылар мен жауапты мекемелер тұрғындардың қауіпсіздігін қамтамасыз ету, судағы қайғылы жағдайлардың алдын алу және қауіпсіздік мәдениетін арттыру бағытындағы жұмыстарды күшейте бермек.