Түркістан облысында өнеркәсіпті әртараптандыру және өңдеу секторын дамыту бағытындағы ірі жобалар кезең-кезеңімен жүзеге асып келеді. Соның айқын дәлелі ретінде Кентау қаласындағы «Turan» арнайы экономикалық аймағында жоғары технологияларға негізделген екі жаңа өндіріс орны пайдалануға берілді. «Kentau Cable Industries» компаниялар тобы жүзеге асырған инвестициялық жобалар аясында жоғары жылдамдықты интернет желілеріне арналған оптикалық кабель өндіретін «Kentau Cable Industries» зауыты мен электр жабдықтарына арналған металл шкафтарын шығаратын «ElectroCore» кәсіпорны ресми түрде жұмысын бастады.
Жаңа өндіріс орындарының ашылуы өңірдің индустриялық әлеуетін арттырып қана қоймай, импортты алмастыру, экспорт көлемін ұлғайту және жүздеген жаңа жұмыс орнын құруға мүмкіндік береді. Сарапшылардың пікірінше, бұл жобалар Түркістан облысының өндірістік картасындағы ең маңызды бастамалардың бірі саналады.
Зауыттардың ашылу рәсіміне Түркістан облысының әкімі Нұралхан Көшеров қатысып, өндіріс саласын дамыту Мемлекет басшысы Қасым-Жомарт Тоқаевтың экономикалық саясатындағы негізгі басымдықтардың бірі екенін атап өтті. Оның айтуынша, бүгінде елімізде шикізатқа тәуелділікті азайтып, жоғары қосылған құны бар өнім өндіретін кәсіпорындарды көбейтуге ерекше көңіл бөлінуде. Осы тұрғыдан алғанда Кентауда іске қосылған жаңа өндірістер өңір экономикасына тың серпін беретін маңызды жобалар қатарында.
Облыс әкімінің айтуынша, қос кәсіпорында екі жүзге жуық жаңа тұрақты жұмыс орны ашылады. Бұл Кентау қаласының әлеуметтік-экономикалық дамуына оң әсерін тигізіп, жергілікті тұрғындарды тұрақты жұмыспен қамтуға мүмкіндік береді. Сонымен қатар өндіріс орындарына қажетті инженерлік инфрақұрылым толықтай дайындалып, инвесторларға қолайлы жағдай жасалған.
«Kentau Cable Industries» зауыты – Қазақстандағы цифрлық инфрақұрылымды дамытуға үлес қосатын маңызды өндірістердің бірі. Кәсіпорын жоғары жылдамдықты интернет желілеріне арналған талшықты-оптикалық кабельдер мен микротүтік пакеттерін шығарады. Жобаның жалпы құны 1,7 миллиард теңгені құрайды.
Зауыттың өндірістік қуаттылығы жылына 33 мың шақырым оптикалық кабель және 12 мың шақырым микротүтік пакеттерін өндіруге мүмкіндік береді. Бұл өнімдер байланыс операторларының, телекоммуникациялық компаниялардың және инфрақұрылымдық жобалардың қажеттілігін қамтамасыз етуге бағытталған. Өндірістің толық циклі бір кәсіпорын ішінде жүзеге асырылады. Барлық технологиялық желілер автоматтандырылған және бағдарламалық басқару жүйесімен жұмыс істейді.
Кәсіпорында Siemens, Bosch, Panasonic, ADVANTECH секілді әлемдік жетекші компаниялардың заманауи өндірістік жабдықтары қолданылған. Бұл өнім сапасын халықаралық стандарттарға сәйкестендіріп, ішкі нарықпен қатар экспорттық бағытта жұмыс істеуге мүмкіндік береді.
Ал «ElectroCore» зауыты электр энергетикасы мен өнеркәсіп саласына арналған металл шкафтарын өндіруге маманданған. Бұл жобаға 1,5 миллиард теңге инвестиция тартылған. Кәсіпорынның жылдық өндірістік қуаты 12 мың дана өнім шығаруға есептелген. Мұнда да жүзге жуық адам тұрақты жұмыспен қамтылады.
Кәсіпорын басшысы Асқар Баймырзаұлының айтуынша, өндіріс қазіргі заманғы технологияларға негізделген және алдағы уақытта өнім түрлерін көбейтіп, экспорт географиясын кеңейту жоспарланып отыр. Оның сөзінше, басты мақсат – Қазақстан нарығын сапалы отандық өніммен қамтамасыз ету және шетелдік өнімдердің импортын азайту.
Кентаудағы жаңа кәсіпорындардың іске қосылуы өңірдегі индустриялық саясаттың жүйелі жүзеге асып жатқанын көрсетеді. Бүгінде «Turan» арнайы экономикалық аймағы инвесторлар үшін ең тартымды өндірістік алаңдардың біріне айналып келеді. Мұнда кәсіпкерлерге дайын инженерлік инфрақұрылым, салықтық жеңілдіктер және инвестициялық қолдау тетіктері ұсынылады.
Жұмыс сапары барысында облыс әкімі Кентау қаласындағы өндірістік паркке де барып, жүзеге асырылып жатқан инвестициялық жобалардың барысымен танысты. Қазіргі таңда мұнда өндіріс, ауыл шаруашылығы, құрылыс материалдары, туризм және қайта өңдеу салалары бойынша ондаған жаңа жоба жүзеге асырылуда. Бұрын бос тұрған немесе пайдаланылмай келген өндірістік ғимараттар қайта жаңғыртылып, заманауи зауыттарға айналып жатыр.
Өңір басшысы жауапты басқармаларға инвестициялық жобаларды жеделдетуді, жаңа өндіріс орындарын көбейтуді және кәсіпкерлерге жан-жақты қолдау көрсетуді тапсырды. Мамандардың бағалауынша, Кентауда іске қосылған қос зауыт Түркістан облысының индустриялық дамуына жаңа серпін беріп, жоғары технологиялы өндірістердің үлесін арттыруға, экспорттық әлеуетті күшейтуге және өңірдің экономикалық тұрақтылығын нығайтуға елеулі үлес қосады.