Түркістан облысында өндірісті әртараптандыру, инновациялық технологияларды енгізу және ауыл шаруашылығы саласын цифрландыру бағытындағы жұмыстар қарқын алып келеді. Соңғы жылдары өңірде жаңа индустриялық жобалар жүзеге асырылып, инвестиция көлемі артып, экспортқа бағдарланған кәсіпорындар саны көбейіп келеді. Осы бағыттағы жұмыстардың нақты көрінісі ретінде Сауран ауданындағы «Шаға» өндірістік алаңында бұқаралық ақпарат құралдарының өкілдеріне арналған пресс-тур ұйымдастырылды. Іс-шара барысында журналистер ауданда жүзеге асырылып жатқан инвестициялық жобалармен танысып, өндіріс орындарының жұмысын көзбен көрді.
Пресс-турдың негізгі мақсаты – Сауран ауданының өндірістік әлеуетін таныстыру, жаңа инвестициялық жобалардың жүзеге асу барысын көрсету және отандық өндірістің мүмкіндіктерін кеңінен насихаттау болды. Бүгінде «Шаға» өндірістік алаңы Түркістан облысындағы заманауи индустриялық орталықтардың біріне айналып келеді. Мұнда ауыл шаруашылығы, құрылыс, машина жасау және қайта өңдеу салалары бойынша бірнеше кәсіпорын табысты жұмыс істеп тұр.
Журналистер алғаш болып «BNK Group» кәсіпорнының қызметімен танысты. Компания еліміздегі ауыл шаруашылығына арналған технологиялық жабдықтарды өндіретін жетекші кәсіпорындардың бірі саналады. Бүгінде кәсіпорын америкалық «Nelson Irrigation» компаниясымен бірлесіп, «BNK IRRIGATION» брендімен айналмалы және фронтальды жаңбырлатып суару жүйелерін құрастырады. Сонымен қатар мұнда ауыл шаруашылығы техникалары дайындалып, цифрлық технологияларға негізделген агродрондар өндірісі қолға алынған.
Ауыл шаруашылығын цифрландыру бүгінде әлемдік агроөнеркәсіптің негізгі бағыттарының біріне айналды. Агродрондар егістік алқаптарын бақылауға, тыңайтқыш пен өсімдікті қорғау құралдарын дәл мөлшермен себуге, өнімділікті арттыруға және су ресурстарын үнемдеуге мүмкіндік береді. Сарапшылардың пікірінше, мұндай технологиялар еңбек шығынын азайтып, ауыл шаруашылығы өндірісінің тиімділігін бірнеше есе арттыра алады.
Пресс-тур барысында «Avatar Agricultural Technology Development» жауапкершілігі шектеулі серіктестігі жүзеге асырып жатқан агродрон өндірісі ерекше қызығушылық тудырды. Жоба толық іске қосылғаннан кейін кәсіпорын жылына 600 дана ауыл шаруашылығына арналған ұшқышсыз аппарат шығаруды жоспарлап отыр. Қазіргі уақытта өндірістік алаң толық дайындалып, қажетті жабдықтар орнатылған, алғашқы сынамалық үлгілер әзірленген. Мамандардың айтуынша, қазір азаматтық авиация саласына қатысты қажетті рұқсат құжаттарын рәсімдеу жұмыстары жүргізілуде. Бұл рәсімдер аяқталған соң кәсіпорын толық өндірістік қуатпен жұмысын бастайды.
Пресс-тур аясында «Aqniet Holding» кәсіпорнының өндірісі де таныстырылды. Компания білім беру мекемелеріне арналған жиһаз өндіреді. Соңғы үш жылда кәсіпорын еліміздің елуге жуық мектебін заманауи жиһазбен қамтамасыз еткен. Сонымен қатар мұнда «KAZMEDPRIBOR» компаниясымен бірлесіп медициналық мекемелерге арналған арнайы жабдықтар шығарылады. Бұл кәсіпорын өңірдегі өңдеу өнеркәсібінің қарқынды дамып келе жатқанын көрсетеді.
Журналистер «Юпитер-М» жауапкершілігі шектеулі серіктестігінің өндірісімен де танысты. Кәсіпорын жаңбырлатып және тамшылатып суару жүйелерін шығарады. Жылдық өндірістік қуаты 1750 тонна болатын зауыт өнімдерін Қазақстанның түрлі өңірлеріне жеткізіп қана қоймай, Өзбекстанға экспорттайды. Кәсіпорында жиырмаға жуық адам тұрақты жұмыспен қамтылған.
Өндірістік алаңдағы тағы бір маңызды жоба – «Turan Su» кәсіпорны. Компания ирригациялық жүйелерді жөндеу және жаңғыртумен қатар, тамшылатып суару ленталары мен полиэтилен құбырларын шығаратын жаңа өндіріс орнын іске қосқан. Жылына 183 мың шақырымнан астам суару ленталарын өндіруге қауқарлы зауыт су үнемдеу технологияларын кеңінен енгізуге мүмкіндік береді. Бұл әсіресе су ресурстары тапшы Түркістан облысы үшін аса маңызды.
Сонымен қатар «TURSAPA» кәсіпорнында полиэтилен өнімдері шығарылса, «Daulet Holding» заманауи ағаш есіктер өндірісін жолға қойған. Соңғы кәсіпорын жылына 36 мыңнан астам есік өндіріп, қырыққа жуық адамды тұрақты жұмыспен қамтып отыр.
Жалпы, Сауран ауданындағы өндірістік жобалар Түркістан облысының индустриялық дамуының жаңа кезеңге өткенін көрсетеді. Инновациялық технологияларды енгізу, ауыл шаруашылығын цифрландыру және экспортқа бағытталған өндірістерді көбейту өңір экономикасының тұрақты өсіміне негіз болмақ. Әсіресе агродрон өндірісінің іске қосылуы Қазақстанның агроөнеркәсіп кешенінде жоғары технологияларды дамытуға тың серпін беріп, Түркістан облысының инвестициялық тартымдылығын одан әрі арттырады.