Алдағы күндері мердігер ұйым ғимарат аумағы бойымен қоршау орнатады. Дегенмен аурухана жұмысы толық көлемде жалғасады – медициналық қызметтер қысқармай көрсетіледі.
Бірінші кезеңде 11 блоктың 5-еуі қайта жаңғыртылады. Аурухананың жұмысын үздіксіз қамтамасыз ету үшін ота жасау блогы мен жансақтау залы уақытша көшіріледі, штаттық кесте өзгеріссіз қалады.
Қайта жаңғыртудың қажеттілігі инженерлік желілердің, тіреуіш конструкциялар мен қасбеттің қатты тозуымен байланысты. Жаңарту барысында сейсмикалық күшейту, коммуникациялар мен қасбетті ауыстыру, жаңа желдеткіш жүйесі, қазандық және трансформаторлық қосалқы станциялар орнатылады.
Пайдалы аумақ 2,5 мың шаршы метрге ұлғаяды. Бірінші қабат фронт-офиске айналып, мұнда ыңғайлы күту аймағы, тіркеу орны және клиникалық-диагностикалық орталық орналастырылады.
Науқастар мен дәрігерлер үшін қолайлы әрі түсінікті орта жасалады.