Түркістан облысында ауылдық елді мекендердің инфрақұрылымын жаңғырту бағытындағы жұмыстар жүйелі түрде жалғасып келеді. Мемлекет басшысының өңірлердің көлік қатынасын жақсарту, ауыл тұрғындарының өмір сүру сапасын арттыру және қауіпсіз әрі қолайлы жол инфрақұрылымын қалыптастыру жөніндегі тапсырмалары аясында жүзеге асырылып жатқан жобалар кезең-кезеңімен өз нәтижесін беруде. Осындай маңызды бастамалардың бірі – Шардара ауданындағы Жаушықұм мен Қалғансыр ауылдарын байланыстыратын аудандық маңыздағы автомобиль жолының пайдалануға берілуі.
Жаңа жолдың ашылуы қос ауыл тұрғындары үшін ғана емес, жалпы ауданның әлеуметтік-экономикалық дамуына оң ықпал ететін маңызды оқиға ретінде бағалануда. Ұзақ жылдар бойы тұрғындар көтеріп келген мәселенің шешімін табуы көлік қатынасын жеңілдетіп қана қоймай, ауыл шаруашылығы, кәсіпкерлік, әлеуметтік қызметтер мен тұрғындардың күнделікті тұрмысын жақсартуға мүмкіндік береді.
Жолдың салтанатты ашылу рәсіміне Шардара ауданының әкімі Арман Қарсыбаев, аудандық мәслихаттың төрағасы Бұлтбай Мүтәлиев, ардагерлер, ауыл ақсақалдары, зиялы қауым өкілдері және жергілікті тұрғындар қатысты. Жиында сөз сөйлеген аудан әкімі бұл жобаның Мемлекет басшысының халықтың әл-ауқатын арттыруға бағытталған тапсырмалары аясында жүзеге асқанын атап өтті.
Арман Қарсыбаевтың айтуынша, сапалы жол – ауылдардың тұрақты дамуының басты көрсеткіштерінің бірі. Сондықтан аудан аумағында жол инфрақұрылымын жақсарту бағытындағы жұмыстар алдағы уақытта да жалғасады. Оның айтуынша, көлік қатынасының жақсаруы тұрғындардың қауіпсіз қозғалысын қамтамасыз етіп қана қоймай, ауыл шаруашылығы өнімдерін тасымалдауға, инвестиция тартуға және кәсіпкерлікті дамытуға да жаңа мүмкіндіктер ашады.
Жоба аясында Шардара ауданындағы КХSH-18 «КХ-163 Жаушықұм – Қалғансыр» аудандық маңыздағы автомобиль жолының жалпы ұзындығы 8 шақырым болатын бөлігі облыстық бюджет есебінен орташа жөндеуден өткізілді. Құрылыс жұмыстарын тәжірибелі мердігер мекеме – «Строительная компания «Строймонтаж» жауапкершілігі шектеулі серіктестігі атқарды.
Жөндеу барысында жол төсемі толық жаңартылып, оның беріктігі мен ұзақ мерзімді пайдалануға жарамдылығын қамтамасыз ететін барлық технологиялық талаптар сақталды. Сонымен қатар жол жабынының сапасы арнайы зертханалық тексерулерден өткізіліп, «Ұлттық жол сапасы орталығы» мамандары тарапынан оң қорытынды берілді. Бұл жаңа жолдың белгіленген мемлекеттік стандарттарға толық сәйкес келетінін көрсетеді.
Салтанатты шара барысында өңірдің әлеуметтік-экономикалық дамуына және жол құрылысының сапалы орындалуына үлес қосқан бірқатар азаматтар марапатталды. Атап айтқанда, «Строительная компания «Строймонтаж» ЖШС директоры Нұрғали Мамбетов, компанияның учаске басшысы Данияр Алпысов және Жаушықұм ауылының медиаторы Қайрат Бекбенбетов «Еңбек ардагері» төсбелгісімен марапатқа ие болды.
Шарада ауыл ақсақалы Шүренбай Түзелұлы сөз сөйлеп, ауыл тұрғындарының көптен күткен қуанышты күнмен құттықтады. Ол мемлекет тарапынан ауылдарды дамытуға бағытталған жұмыстардың халықтың тұрмысын жақсартып, жастардың туған жерінде тұрақтауына оң әсер ететінін атап өтті. Ал ауылдың қадірлі қариясы Әбілқасым Ілесов ақ батасын беріп, жаңа жолдың елге ұзақ жылдар бойы адал қызмет етуіне тілектестігін білдірді.
Мамандардың айтуынша, жаңа жолдың пайдалануға берілуі Жаушықұм және Қалғансыр ауылдарының тұрғындары үшін ғана емес, Шардара мен Келес аудандары арасындағы көлік қатынасын да айтарлықтай жеңілдетеді. Сонымен бірге жедел жәрдем, өрт сөндіру және басқа да арнайы қызметтердің шалғай ауылдарға уақытылы жетуіне мүмкіндік жасап, жол-көлік қауіпсіздігін арттырады.
Соңғы жылдары Түркістан облысында жол инфрақұрылымын дамытуға ерекше көңіл бөлінуде. Облыс аумағында республикалық, облыстық және аудандық маңыздағы автомобиль жолдарын жөндеу мен жаңғырту бағытында ауқымды жобалар жүзеге асырылып жатыр. Бұл жұмыстардың негізгі мақсаты – тұрғындардың өмір сүру сапасын арттыру, өңірлер арасындағы байланысты нығайту және экономиканың тұрақты дамуына жағдай жасау.
Жаушықұм – Қалғансыр автожолының пайдалануға берілуі де осы кешенді жұмыстардың жарқын нәтижесі болып отыр. Жаңа жол тұрғындардың қауіпсіз әрі жайлы қатынасын қамтамасыз етіп қана қоймай, ауылдардың әлеуметтік және экономикалық әлеуетін арттыруға, өңірдің одан әрі дамуына тың серпін беретін маңызды инфрақұрылымдық жоба ретінде бағалануда.