Сауалнамаға қатысқандардың 70%-дан астамы елдің дұрыс бағытта дамып келе жатқанын айтады, деп хабарлайды BAQ.KZ тілшісі.
Қоғамдық саясат институтының зерттеу нәтижелеріне сәйкес, респонденттердің 70%-дан астамы Қазақстанның дұрыс бағытта дамып келе жатқанын атап өткен. Мұндай пікір әсіресе ауыл тұрғындары (80,7%), 24 жасқа дейінгі жастар (78,9%) және әйелдер (72,2%) арасында кең таралған.
Халықтың қазіргі саяси және әлеуметтік-экономикалық жағдайға берген бағасы салыстырмалы түрде біршама ұстамды оптимизмді көрсетеді – сәйкесінше 76,5% және 67%.
Бұл нәтижелер елде жүргізіліп жатқан реформаларға деген оң көзқараспен байланысты. Мәселен, қоғамдық-саяси салада азаматтарға ауыл және аудан әкімдерін тікелей сайлау мүмкіндігі берілді, сайлау жүйесі ашық бола түсті, Конституциялық сот қайта қалпына келтірілді, ал гендерлік теңдік бастамалары әйелдерге саясат пен қоғамдық өмірге белсенді қатысу үшін жаңа мүмкіндіктер ашты.
Әлеуметтік-экономикалық саладағы өзгерістер бюджет саласы қызметкерлерінің табысын айтарлықтай арттыруға, ауқымды қолдау бағдарламаларын іске қосуға, жер ресурстарына әділ қолжетімділікті қамтамасыз етуге, сондай-ақ қауіпті және зиянды өндірістерде жұмыс істейтіндер үшін зейнет жасын төмендетуге мүмкіндік берді.
Жалпы, сауалнама нәтижелері бойынша респонденттердің 89%-ы өз көңіл-күйін оң деп сипаттаған. Позитивті көзқарас көбінесе 18-35 жас аралығындағы жастарға, бойдақ немесе отбасылы азаматтарға және жоғары білімі бар респонденттерге тән.