Шымкентте Айсүгір көшесі бойындағы аумағы 120 шаршы метр жерді алып жатқан тұрғын үй толығымен өртеніп кетті. Салдарынан бір ер адам зардап шекті.
Өрт туралы «101» басқару пультіне 8 тамызда сағат 18.57-де хабарлама келіп түскен.
Өрт сөндірушілер тұрғын үйдің толығымен, ішіндегі үй заттары, жиһазы, тұрмыстық техникасы жанып жатқандығын анықтады. Сондай-ақ үйдің ішінде газ баллоны болған.
№2 өрт сөндіру бөлімінің аға өрт сөндіруші-құтқарушысы, азаматтық қорғау сержанты Ғалымжан Битанов 50 литрлік газ баллонды қауіпсіз аймаққа алып шығарды.
Өрт 19.23-те оқшауланып, 19.42-де сөндірілді. Қызыл жалынды сөндіруге Өрт сөндіру қызметінің 20 қызметкері мен 5 бірлік техникасы жұмылдырылды.
Өрттің салдарынан 1992 жылы туған ер адам 19 % күйік алып, ауруханаға жеткізілді. Жағдайы қанағаттанарлық.
Қалалық ТЖД мәліметінше, қазіргі таңда өрттің себебі мен материалдық залалдың мөлшері анықталуда.