«Қазақтелеком» АҚ Корпоративтік бизнес дивизионы жыл сайынғы International Carrier Meeting 2026 кездесуін өткізді. Іс-шара China Telecom, China Unicom, China Mobile, «МегаФон», «Ростелеком», Arelion Sweden, IBasis, PCCW Global, RETN және басқа да жетекші шетелдік байланыс операторлары мен саланың негізгі серіктестері арасында диалог орнатуға арналған алаңға айналған.
Іс-шара аясында жаһандық цифрлық экожүйені дамытуға, халықаралық байланысты кеңейтуге және елдер арасындағы ынтымақтастықты нығайтуға елеулі үлес қосқан компанияларды марапаттау рәсімі өтті.
Марапат иегерлері қатарында Қытай, Ресей, Орталық Азия және Еуропа елдерінің телекоммуникация саласының өкілдері бар.
Кездесуді ашқан Корпоративтік бизнес дивизионының бас директоры Асқар Қаиров халықаралық операторлармен тұрақты серіктестік қатынастарды дамытудың маңыздылығын атап өтті.
«Бүгінде телекоммуникация саласы ерекше қарқынмен дамып келеді және жетістік көп жағдайда компаниялардың сараптаманы, технологиялар мен инфрақұрылымдық мүмкіндіктерді біріктіре алу қабілетіне байланысты. «Қазақтелеком» үшін халықаралық серіктестікті дамыту – стратегиялық басымдықтардың бірі. Біз әлемнің жетекші операторларымен өзара іс-қимылды жүйелі түрде кеңейтіп, Қазақстанның Еуразияның цифрлық хабы ретіндегі рөлін күшейтуге мүмкіндік беретін инфрақұрылымды дамытып келеміз», – деп атап өтті Асқар Қаиров.
Іс-шара барысында «Қазақтелеком» шетелдік серіктестеріне цифрлық инфрақұрылым мен деректердің халықаралық транзитін дамыту бағытындағы жұмыстың нәтижелерін таныстырды. Қатысушылар саланың өзекті үрдістерін, өзара іс-қимылды кеңейту мүмкіндіктерін, жаңа жобалар мен халықаралық телекоммуникациялық инфрақұрылымды дамытудың басым бағыттарын талқылады.
Еуропа мен Азия арасындағы негізгі арналардың қиылысында орналасқан Қазақстанның бірегей географиялық жағдайы заманауи магистральдық инфрақұрылымның дамуымен ұштаса отырып, деректерді берудің тиімді транзиттік бағыттарын қалыптастыруға жағдай жасайды. Компания халықаралық өзара іс-қимылды жүйелі түрде кеңейтіп, жетекші шетелдік байланыс операторларымен жаңа желілік түйісулер құру бойынша жобаларды іске асыруда. Бұл инфрақұрылымның өткізу қабілетін арттыруға, халықаралық арналардың тұрақтылығын қамтамасыз етуге және деректерді беру кезіндегі кідірістерді азайтуға мүмкіндік береді.
International Carrier Meeting 2026 телекоммуникациялық компаниялар арасындағы тікелей диалогтың маңыздылығын тағы бір мәрте көрсетіп, жаңа бірлескен бастамаларды талқылауға арналған алаңға айналды. Халықаралық байланыстарды нығайту және трансшекаралық цифрлық инфрақұрылымды дамыту Қазақстанның Еуразиядағы негізгі цифрлық және транзиттік орталықтардың бірі ретіндегі әлеуетін одан әрі ілгерілетуге ықпал етеді.
Ал 2026 жылғы 3–4 қыркүйекте «Қазақтелеком» АҚ Алматы қаласында өткен жетекші телекоммуникациялық компаниялар, байланыс операторлары, технологиялық серіктестер мен цифрлық нарық қатысушыларының өкілдерін біріктірген CIS GCCM 2026 VIII жыл сайынғы конференциясына қатысты. Талқылаулардың негізгі тақырыптары цифрлық инфрақұрылымды дамыту, 5G технологияларын енгізу, жасанды интеллектіні қолдану, киберқауіпсіздік және жаңа байланыс арналарының дамуына арналды. Компания өкілдері халықаралық операторлармен бірқатар іскерлік кездесулер өткізіп, серіктестік қатынастарды кеңейту және жаңа маршруттарды дамыту перспективаларын талқылады.
Осы кездесулер аясында «Қазақтелеком» компаниясының әзербайжандық серіктесі AzerTelecom Int. бірлесіп жүзеге асырып жатқан стратегиялық жоба – Каспий теңізінің түбімен талшықты-оптикалық байланыс желісін (ТОБЖ) салу жобасы бойынша жаңартылған ақпарат ұсынылды. «Жобаның техникалық бөлігі логикалық аяқталу кезеңіне жақындады. Атап айтқанда, маршруттың теңіз бөлігін төсеу жұмыстары аяқталды, қазіргі уақытта кабельді жерүсті инфрақұрылымымен жалғау жұмыстары жүргізілуде. Маршрутты толық коммерциялық пайдалануға 2027 жылдан бастап беруді жоспарлап отырмыз», – деп атап өтті ДКБ Халықаралық келісімдер департаментінің директоры Айнұр Байбатырова.