Атырау қаласында тұрғын үйді басқару мәселелері бойынша форум өтті Атырау қаласында «ҮЙДІ БАСҚАРУ: ЖАУАПКЕРШІЛІК, СЕНІМ, НӘТИЖЕ» атты форум-семинар өтті.
Іс-шара «AMANAT» партиясының «TURGYNDAR AMANATY» жобасы аясында ұйымдастырылды. Кездесуге «Тұрғын үй-коммуналдық шаруашылығын жаңғырту мен дамытудың қазақстандық орталығы» АҚ Тұрғын үй қатынастары және нормативтік-техникалық реттеу департаментінің директоры Марғұлан Женісұлы Әбдікәрімов, Жамбыл қаласы әкімінің орынбасары Тілек Алдабергенұлы Махуов, депутаттар, салалық сарапшылар және басқарушы ұйымдардың өкілдері қатысты.
Жиын барысында тұрғын үй-коммуналдық шаруашылық саласындағы заңнамаға енгізілген өзгерістер, көппәтерлі тұрғын үйлерді басқаруда ашықтықты арттыру және тұрғындардың белсенділігін күшейту мәселелері талқыланды.
Сондай-ақ «TURGYNDAR AMANATY» жобасы тұрғын үй секторын заманауи әрі тиімді басқару жүйесін дамытуға бағытталғаны атап өтілді.
Кездесу қорытындысында қатысушылар мемлекет, басқарушы ұйымдар және тұрғындардың бірлескен жұмысы тұрғын үй-коммуналдық жүйені одан әрі жетілдірудің негізгі факторы екеніне тоқталды.