Абай облысында балаларға әлеуметтік көмек көрсететін орталық заманауи жабдықтармен жабдықталған

 Халықаралық балаларды қорғау күні қарсаңында Абай облысының әкімі Нұрлан Ұранхаев «Әлеуметтік қызмет көрсету орталығы» КММ-де болып, мекеменің жұмысымен танысты.

— Орталықтың жаңа ғимараты заманауи жабдықтармен, жиһаздармен және кең кабинеттермен жабдықталған. Енді балаларда жаңа көлік болады. Біздің күш-жігеріміз әр баланың ғылымда, спортта, өнерде және басқа салаларда өз талантын дамытуына бағытталған. Балалар – біздің барымыз және оларға әрқашан қолдау көрсетуге дайынбыз, — деді облыс әкімі.

Орталыққа екі бөлім кіреді. Атап айтқанда, 35 балаға арналған күндізгі бөлім және 18 жастан асқан 366 адамға қызмет көрсететін үйде қызмет көрсету бөлімі. Күндізгі бөлімше мамандарының барлық топтары мен кабинеттері жаңа жиһазбен, балалардың демалуына арналған кереуеттермен жабдықталған.

— Пәндік дамыту ортасын құру үшін құм терапиясының элементтері, Монтессори техникасы, су терапиясы және арттерапия сатып алынды. Әлеуметтік-тұрмыстық бағдарлау кабинеті де жиһазбен және қажетті тұрмыстық техникамен толық жабдықталған. Бұл өз бетімен өмір сүру үшін қажетті әлеуметтік-тұрмыстық дағдыларды қалыптастыруға мүмкіндік береді. Сонымен қатар барлық кабинеттерде теледидарлар мен интерактивті тақта бар, бұл сабақтарды қызықты өткізу үшін қажетті. Емдік дене шынықтыру кабинетіне мүгедек балаларды әлеуметтік-медициналық оңалту үшін пайдаланылатын батут, стационарлық велосипед және иппотренажер сатып алынған, — деп хабарлады Абай облысы әкімдігінен.

Айта кетейік, өткен жылы орталыққа 1700 шаршы метр ғимарат беріліп, мұқтаж жандарға көмек көрсету мүмкіндіктерін едәуір жақсартты.