Шымкентте өндірістік инвестиция саласындағы жұмыстар пысықталды

Шымкент қаласының әкімі Мұрат Әйтеновтің жетекшілігімен инвестициялық штабтың кезекті отырысы өтті. Онлайн форматта өткен жиынға салалық басқарма басшылары мен аудан әкімдері, іскерлік орта өкілдері қатысты.

Жиын барысында агроиндустриялық аймақты құру жөніндегі жұмыстың барысы, инвестициялық жобалардың таныстырылымы мен оларды іске асыру барысындағы ұйымдастырушылық мәселелер, штаб отырыстарында берілген хаттамалық тапсырмалардың орындалуы талқыланды.

Қала әкімі М.Әйтенов агроиндустриялық аймақ орналасатын аумақтың инфрақұрылымдық әлеуетін толық зерделеуді тапсырды. Берілетін электр энергиясының қуатын, су көздерінің қорын есептеу бойынша нақты жұмыстар атқарылуы керектігіне көңіл бөлді.

Штаб отырысында қалалық ауылшаруашылығы және ветеринария басқармасы ұсынған инвестициялық жобалардың өзекті мәселелері қаралды. Оның ішінде жылына 50 млн дана жұмыртқа шығаруды көздеп отырған «Аймар құс» ЖШС-ның құс фабрикасын ашуға қажетті инфрақұрылым тарту мәселесі сөз болды. Жобамен мұқият танысқан қала әкімі М.Әйтенов салалық басқарма басшыларына тиісті ұсыныстар енгізу жөнінде тапсырма берді.

Құс фабрикасын салуға «Шағыр Агро» компаниясы да мүдделі екендігін білдіруде. Мұнда жылына 20 мың тонна бройлерлік құс еті өндірілмек. Жобаны іске асыру үшін аумақтың егжей-тегжейлі жоспарына өзгерістер енгізілуі қажет. Қала әкімі М.Әйтенов бұл мәселе бойынша да салалық басқармаға мәселені толық зерделеп, тиісті шешім қабылдауды жүктеді.

Басқарма ұсынып отырған тағы бір жоба – 600 бас ірі қараға арналған ет-сүт фермасы. Бұл жоба бойынша қаланың Бас жоспарына сәйкес нақты шешім қабылданатын болады.

Жиын барысында бірқатар инвестициялық құрылыс жобаларының да таныстырылымы өтті. Оның ішінде «Шымкент ақпараттық технологиялар университеті» ғылыми және білім беру инновациялық кешенін салу жобасы ұсынылды. Кешен ақпараттық технологиялар бойынша ғылыми база ретінде жасақталып, лабороториялық зертханалар ашылмақ. Мұнда 6 мың студент білім алып, жатақханамен қамтылмақ. Кешенде 600 адам еңбек ететін болса, оның 400-ден астамы – отандық және шетелдік ғалымдар болмақ.

Кешен жобасымен жіті танысқан қала әкімі М.Әйтенов бұл жобаны құрылысы қарқын алған Тұран шағын ауданында орналастыру мүмкіндіктерін қарастыруды тапсырды.
Медицина қызметкерлеріне арналған 12 қабатты тұрғын үйлер құрылысын жүргізу мәселесі де штаб отырысында қаралып, қолдау тапты. Тұрғын үй келесі жылы алғашқы тұрғындарын қабылдайтын болады.

Шымкент сити шағынауданында салынатын 2 заманауи жекеменшік мектептердің жобалары да қолдау тауып, құрылыс жұмыстары жақын күндері басталатын болды. «Шымкент ситиде» бой көтеретін екі оқу ордасының жалпы сыйымдылығы 2200 оқушыға арналған.

Штаб барысында бизнес санатындағы 8 көпқабатты тұрғын үйлердің жобалары таныстырылып, мақұлданды. Құрылыс жұмыстарын отандық және шетелдік құрылыс компаниялары жүргізетін болады.

Жиында сондай-ақ Таскен шағынауданында салынатын 300 оқушыға арналған жекеменшік мектеп пен 500 орынға арналған жатақхана жобаларының таныстырылымы да өтті. Ұсынылған нысандар қолдау тауып, олардың құрылыстары да жақын күндері басталады.

Қала басшысы М.Әйтенов Шымкенттің өркендеуіне инвесторлар қызығушылық танытып отырғанын мәлімдеді. Бұл әсіресе құрылыс саласының қарқын алуына негіз болып отыр деді. Сала жетекшілеріне құрылыс компанияларына жер бөлуде ауқымды жер учаскелерін бірден бөліп беруге жол бермей, олардың құрылыс жүргізу қарқынын есепке алып бөлуді тапсырды. Бөлінген жер учаскелері белгілі мерзім ішінде игерілмей бос жатса, оны қайтарып алу жөнінде механизмдер қалыптастыруды жүктеді.

Күн тәртібіндегі үшінші мәселе бойынша штабтың алдыңға отырыстарында берілген хаттамалық тапсырмалардың ішінде 5 мәселе мерзімінде орындалмай қалғандығы айтылды. Қала әкімі мемлекеттік құрылымдар жетекшілеріне берілген тапсырмалардың барлығы мерзімінде әрі сапалы орындалуы керектігіне назар аударып, экономикаға инвестиция тарту мәселесі жайбарақаттылықты көтермейтінін мәлімдеді. Алдағы аптада инвестиция бойынша жұмыс жиыны өтетінін хабарлап, саладағы өзекті мәселелерді тағы бір мәрте пысықтау керектігін ескертті.

Штаб отырысын қорытындылаған қала басшысы М.Әйтенов Шымкенттің заманауи мегаполис ретінде қалыптасуы инвестиция арқылы жүзеге асатынын жеткізді. Инвесторлар тарту арқылы қала экономикасы серпін алады. Инвестиция тартуға жауапты құрылымдар құрылыс нарығымен шектеліп қалмай, өндірістік жобаларды іздестіруде белсенділік танытуы керек екендігін еске салды. Өндіріс орындарын ашу арқылы тұрақты жұмыс орындары ашылып, экономика үлесінде жергілікті тауарлардың үлесі артатынын, қала тұрғындарының тұрмыстық ахуалы жақсаратынын мәлімдеді. Барлық сала жетекшілерін осы бағытта нәтижелі жұмыстар жүргізуге шақырды.