Бәйдібек: жолдарды қардан тазалау жұмыстары тексерілді

Аудан әкімі Ерлан Нұрмаханов Кеңсай елді мекенінің Жамбыл облысымен шектесетін шекарасына арнайы барып, облыстық маңызы бар КХ-1 Бірлік — Жарықбас — Қошқарата автомобиль жолын қардан тазарту жұмыстарымен танысты.

Аудан басшысы жол тазалау жұмыстарының сапасын тексеріп, жол қауіпсіздігін қамтамасыз етудің маңыздылығын атап өтіп, жауапты мекемелерге жол қозғалысының үздіксіз болуын қадағалап, тұрғындардың қауіпсіздігін қамтамасыз ету үшін қажетті шараларды уақытылы атқаруды тапсырды.

Оңтүстік жолдары КММ-нің Бәйдібек аудандық бөлім басшысы Ұ.Оразалыға жолдардың жағасына «қар тоқтату» қою мәселесі бойынша бірқатар ұсыныстар айтып, қардың қалың түсуі көлік қатынасына кедергі келтірмеуі үшін әкімдік тарапынан жағдай тұрақты бақылауда болатыны айтылды. Бұл шара қыс мезгіліндегі төтенше жағдайлардың алдын алу мақсатында жүзеге асырылуда

Сонымен қатар, Ерлан Нұрмаханов Кеңсай елді мекеніндегі кіші футбол алаңшасын және Ақтас елді мекеніндегі жаңадан соғылған әкімшілік ғимаратының жағдайымен танысып, тұрғындарға сапалы қызмет көрсетуге толық дайын болуын қамтамасыз ету мақсатында бірқатар тапсырмалар берді.

Әсіресе, қызметкерлердің тиімді жұмыс істеуі, ғимараттың техникалық жабдықталуы және азаматтарға қолайлы жағдай жасау мәселелеріне ерекше назар аударылды.