Жетісуда 60 отбасы үйлі болды

 Облыс орталығында әлеуметтік осал топ өкілдері мен кезекте тұрған көпбалалы аналар қоныс тойын тойлады, деп хабарлайды BAQ.KZ тілшісі.

Өңірде 15 мыңнан астам тұрғын пәтер кезегінде тұр. Алдағы 5 жылда мыңдаған тұрғынды тұрғын үймен қамтамасыз ету жоспарланған. Бүгінде құрылыс жұмыстары қарқынды жүріп жатыр. Жақында Қала әкімі Ернат Бәзіләлеуметтік тұрғыдан қолдауға мұқтаж азаматтарға, ата-ана қамқорлығынсыз қалған балалар мен көпбалалы отбасыларға арналған 60 жаңа пәтердің кілті табыстады.

Бүгін заманауи талаптарға сай салынған, жайлы әрі әсем үйлер көп жылдан бері пәтер кезегінде тұрған азаматтарға беріліп отыр. Алғашқы 60 отбасыға «Шаңырақ күні» мерекесіне орай облыс әкімі Бейбіт Исабаев арнайы келіп пәтер кілттерін табыс етіп, қуаныштарымен бөліскен еді. Бүгін тағы 60 отбасы баспаналы болып отыр. Жыл соңына дейін шамамен 1500-ге жуық отбасын жаңа үймен қамтамасыз етуді жоспарлап отырмыз, — деді Е.Бәзіл.

«Бірлік» шағын ауданында пайдалануға берілген бұл тұрғын үй кешенінде 15 бір бөлмелі, 15 екі бөлмелі және 30 үш бөлмелі пәтер бар. Олар отбасылардың сұранысына сай тарту етілді.

Осы күнді ұзақ күттім. Қиындық көріп, жалдамалы пәтерде тұріп келдік. Балаларым қуанып жатыр пәтеріміз керемет, өзіміз ойлағаннан да жақсы болды, өте жайлы. Облыс әкімі мен қала әкіміне алғысымды айтамын, Бұл тек мен үшін емес, барлық көпбалалы аналар үшін үлкен үміт, үлкен демеу. Еліміз аман, жұртымыз тыныш болсын!, — дейді көпбалалы ана Әйгерім Қайыпбекова.

Айта кетейік, былтыр Талдықорған қаласында барлық бағдарлама бойынша 1283 отбасы қоныс тойын тойласа, биыл бұл көрсеткіш 1500-ге жуықтауы мүмкін. Осы күнге дейін, яғни жыл басынан бері 248 отбасы баспаналы болған. Алда тағы да бұл дәстүр жалғасын табады.