Биыл Көлсай көлдеріне 457 мың турист келді

Алматы облысындағы Көлсай көлдеріне биыл 457 мың турист келді, деп хабарлайды 24kz.

Бұл былтырғымен салыстырғанда екі есеге көп. Бір айта кетерлігі, Көлсайдың тұмса табиғатын тамашалауға келетін шетелдік туристердің де саны артқан. Онда Үндістан, Біріккен Араб Әмірліктері мен Ресей және Қытайдан саяхатшылар жиі барады.

Ардақ Айбарұлы, тілші:

— Жыл басынан бері «Көлсай көлдері» мемлекеттік ұлттық табиғи паркіне келетін туристердің саны 457 мыңға жетті. Жұмыс күндері мұнда екі мыңға жуық, ал демалыс күндері алты мыңдай саяхатшы ат басын тірейді. Демалушылардың үштен бір бөлігі шетел азаматтары. Көлсайға Үндістан, Парсы шығанағындағы елдер мен Ресейден турист көп келді.

Али Альшахи, саяхатшы:

— Бұл менің Қазақстанға алғаш келуім. Өзім Араб Әмірліктерінің азаматымын. Осында отбасымызбен демалып жатырмыз. Бағасы қолжетімді. Ең бастысы, мұнда қауіпсіздікке баса мән беріледі екен. Бұл біз үшін өте маңызды.

Лин Нгу, саяхатшы: — Біз Вьетнамнан келдік. Ұлым Қазақстанда бір айлық тәжірибеден өтіп жатыр. Көлсайды көрсем деп екі жыл бойы армандады. Міне, енді сол арманы орындалғанына қуанып жүр. Табиғаты өте керемет жер екен. Адамдары да, инфрақұрылымы да көңілден шықты.

Табиғи парк аумағында 9 туристік маршрут бар. Демалушылар әсіресе, төменгі Көлсай мен Қайыңдыға және Саты ауылына көп барады. Ұлттық парк ЮНЕСКО-ның бүкіләлемдік биосфералық резерваттар жүйесіне енген. Биыл абаттандыру жұмыстарына 68 млн теңге бөлінді. Оған қайықтарды қоюға арналған орын әзірленіп, жаяу жүргіншілер жолы жөнделуде.

Руслан Иманбай, «Көлсай көлдері» МҰТП Экологиялық ағарту және туризм бөлімінің басшысы:

— Жалпы мына біздегі төменгі Көлсай мен жоғарғы Көлсайға жаяу жүргіншілерге арналған жолды жасау бойынша 30 миллион қаражат бөлінген. Одан кейін төменгі Көлсайға түсуге 26 миллион теңге қаражат бөлініп отыр, жаяу жүргіншілерге арналған жолды жасайын деп отырмыз. Оның бәрін осы жылдың аяғына дейін жасаймыз.

Көлсайға биыл 500 мыңға жуық турист келеді деген болжам бар. Саяхатшылардың саны артқан сайын атқарылатын жұмыс көлемі де ұлғаяды. Ол экологиялық тепе-теңдікті сақтау үшін аса қажет. Орманды қалпына келтіру мақсатында биыл мұнда 95 мың түп Шренка шыршасы егілді.