Түркияға 55 тонна гуманитарлық көмек жіберіледі

Мемлекет басшысы Қасым-Жомарт Тоқаевтың тапсырмасына сәйкес Қазақстан Республикасы Түркия Республикасына қосымша гуманитарлық көмек көрсетеді.

«Бұл мәселе ҚР Премьер-министрінің бірінші орынбасары Роман Склярдің төрағалығымен өткен Үкіметтік комиссияның отырысында талқыланды» деп хабарлайды ҚазАқпарат Үкіметтің ресми сайтына сілтеме жасап.

Гуманитарлық көмекте жалпы салмағы шамамен 55 тонна болатын киім-кешек (жылы күртешелер мен шалбарлар), қысқы шатырлар, металл кереуеттер, төсек-орын жабдықтары және басқа да күнделікті қолданысқа қажетті заттар бар.

Жүктер әуе көлігімен Түркияның Газиантеп қаласына жөнелтіледі.

Қазақстан биыл ақпан айының басында болған жойқын жер сілкіністерінің салдарын жоюда Түркияға қолдау көрсетуде.

Айта кетейік, Қасым-Жомарт Тоқаев Үкіметке Түркияға қосымша гуманитарлық көмек жіберу жөнінде тапсырма берген болатын.

Бұған дейін хабарлағанымыздай,  Қазақстаннан түрік жұртына көмек ретінде жіберілген киіз үйлер тиелген 8 автоколонна Инджирлик әуе базасынан Кахраманмарашқа қарай жол тартты.

«Зілзаладан зардап шеккен түрік жұрты киіз үйлерді асыға күтуде. Себебі, бұл өңірдегі тұрғындардың басым бөлігі баспанасыз қалды» деді ҚазАқпарат.