Шымкентте 300-ден астам әйел эко әдісімен ана атанды

Мегаполисте соңғы үш жылда ЭКО әдісімен 336 сәби дүниеге келді. Талай жанның арманы «Аңсаған сәби» президенттік бағдарламасы аясында МӘМС жүйесінің көмегімен орындалуда.

Жоғары технологиялық медициналық көмектің қолжетімділігі арқасында қазіргі таңда 100-ден астам әйел жүктілік кезеңінде. Сондай-ақ «Экомед-Шымкент» клиникасында биыл 400-ден астам әйелге ана бақытын сыйлауға арналған квота қарастырылған.

Бүгінде міндетті әлеуметтік медициналық сақтандыру аясында жоғары технологиялық медициналық көмектің қарқын алғаны байқалуда. Қазіргі таңда қалада мұндай қызмет түрлерін ұсынатын 10 мекеме жұмыс істейді. Орталықтар саны артуының нәтижесінде науқастарға бас-ми, қан тамырлары мен жүрек ауруларын емдеуде күрделі ота жасау мүмкіндігі артып отыр.

КТ, МРТ сынды қымбат медициналық диагностикалық қызметтер 2020 жылға дейін әлеуметтік осал топтағы азаматтарға тегін көрсетілген болса, бүгінде барлық сақтандырылған азаматтарға ақысыз негізде қолжетімді.