«Самұрық-Қазына» тобының қарызы қанша

Бүгін Ақордада БАҚ өкілдерінің сауалына жауап берген «Самұрық-Қазына» АҚ басқарма төрағасы Нұрлан Жақыпов қордың қанша қарызы бар екенін айтты. 

– Жалпы, «Самұрық-Қазына» тобы бойынша қарызымыз 10 трлн теңгеден астам. Бұл – біз үшін ыңғайлы деңгей. Себебі, біз ең алдымен ковенанттарды дұрыс сақтап жүрміз. Екіншіден, біздің бүкіл қаржылық коэффициенттер және ковенанттар жасыл аймақта, — деді қор басшысы. 

Сонымен қатар ол құрамына кіретін компаниялардың шамамдан тыс қарызы жоқ екенін баса айтты.

– Бәрі жасыл аймақта. Біз бұл мәселені арнайы бақылауда ұстап отырмыз. Жаһандық тәжірибеге сәйкес, барлық қаржы институты, компаниялар өндірістік бағдарламаларын іске асыру үшін қарыз тартады, — деді Нұрлан Жақыпов. 

Айта кетейік, бүгін Ақордада Президент Қасым-Жомарт Тоқаев пен елімізге ресми сапармен келген Иордания Королі II Абдалла бен әл-Хусейн жоғары деңгейде келіссөздер өткізеді.

Естеріңізге сала кетсек, кеше Президент Қасым-Жомарт Тоқаев Иордания Королін Астана әуежайынан қарсы алған еді. 

Мәртебелі мейман мінген бортты ел шекарасынан елордаға дейін Қазақстан Республикасы Әуе қорғанысы күштерінің ұшақтары алып жүрді.