Түркістанда қазақ күресінен Қажымұқан Мұңайтпасовтың жүлдесіне арналған азия кубогы өтті

Түркістан қаласындағы қазақ күресінен ересектер арасында Қажымұқан Мұңайтпасовтың жүлдесіне арналған Азия кубогы аяқталды.  «Түйе балуан»  атанған батысқазақстандық Темірлан Көлбай бас жүлдеге ие болып,  «Нива» автокөлігін жеңіп алды.

Екі күнге созылған дүбірлі додада қазақстандық балуандар өз мықтылықтарын көрсетіп, Азия құрлығы бойынша теңдессіз  екендігін көрсетті. Кезінде халқымыздың атақ-даңқын күрес арқылы бүкіл әлемге танытқан Қажымұқан Мұңайтпасов та талай жеңістің шыңына жетті. Биыл кең көлемде ұйымдастырылған бұл Азия Кубогында «Түйе балуан»  атанған  талантты балуан Темірлан Көлбай көпшіліктің ыстық ықыласына бөленді.  Ал Алматы облысының өкілі Мади  Еділбаев күміс жүлдегер атанса, қола жүлдені Абай облысының мақтанышы Әсет Ахметжанов қанағат тұтты. Жеңімпаздар мен жүлдегерлерді Түркістан облысының дене шынықтыру және спорт басқармасының басшысы Қанат Жолдықараев пен күрестің білікті маманы Қуат Байходжаев, сонымен қатар қазақ күресінен Қазақстан Республикасының мемлекеттік жаттықтырушысы Жеңіс Биткөзовтер марапаттап, таланттыларды танытты. Айта өтерлігі, аламан күрес додасының бас жүлдесіне  Ордабасы ауданының  әкімі Нұрбек Бадырақов демеуші болып,  ордабасылықтар атынан автокөлікті сыйға тартты. Осылайша, қазақ күресінің жаңғыруына  үлесін қосты.

Қазақ күресі ассоциациясы өкілдерінің айтуынша, Қажымұқан атындағы Азия Кубогын жыл сайын дәстүрлі түрде ұйымдастыру жоспарланып отыр.

Түркістан облысы әкімнің баспасөз қызметі