Созақта киік атумен айналысқан екі браконьер ұсталды

Түркістан облысында браконьерлер ұсталды, деп хабарлайды BAQ.KZ ҚР ЭТРМ Орман шаруашылығы және жануарлар дүниесі комитетіне сілтеме жасап.

2023 жылғы 24 қыркүйек күні сағат 20:30 шамасында «Охотзоопром» ӨБ» РМҚК-ның Қызылорда өңірлік филиалының Шымкент тірек бекетінің инспекторлары, Түркістан облыстық орман шаруашылығы және жануарлар дүниесі аумақтық инспекциясы қызметкерлерінің қатысуымен рейдтік іс-шара жүргізді. 

Шара барысында Түркістан облысы, Созақ ауданы, Қыземшек ауылынан шамамен 70-80 шақырымда, солтүстік-шығыс бағытында орналасқан «Иінді» деп аталатын далалық жерде із кесу барысында, “Урал” мотокөлігін тізгіндеген 1982 жылғы жергілікті тұрғын мен Тасты ауылының 1991 жылғы тұрғыны ұсталды. Тексеру барысында ішкі құрылыстары алынған 7 бас жабайы аңның (болжам бойнша киік) өлі денелері және құжаты жоқ 12 калибрлі, қос ұңғылы аңшы мылтығы анықталып, тәркіленді. Аталған іс бойынша Түркістан облысы, Созақ аудандық полиция бөлімінде ҚР ҚК-нің 337 бабының 3 тармағымен қылмыстық іс қозғалды, — делінген комитет хабарламасында.