Жетісай: аудан басшысы аппарат мәжілісін өткізді

Жетісай ауданының әкімі Серік Үсенұлы Мамытовтың төрағалығымен өткен аппарат мәжілісіне аудан әкімінің орынбасарлары мен қала, кент, ауылдық округ әкімдері, бөлім басшылары қатысты.

Мәжілістің күн тәртібінде бекітілген аудандағы көктемгі дала жұмыстарына дайындықтың барысы, яғни, сор шаю, жеңілдетілген жанар жағар май, минералды тыңайтқыштар мен шаруалардың ағын суға берешегі жайлы аудандық ауыл шаруашылығы және жер қатынастары бөлімінің басшысы Нұртас Тұрсынбеков пен «ҚазСуШар» РМК Түркістан филиалы Жетісай өндірістік бөлімшесі басшысының орынбасары баяндама жасаса, аудандық ішкі саясат бөлімінің басшысы Тамара Ташева мен «Қоғамдық келісім» КММ Жетісай аудандық филиалының басшысы Данияр Мырзамұратов аудандағы ұлтаралық татулық пен саяси тұрақтылықты сақтау бойынша атқарылып жатқан жұмыстарға, этносаралық қатынастардың өзекті мәселелеріне тоқталды.

Сонымен қатар, мәжіліс барысында аудандық тұрғын үй-коммуналдық шаруашылығы, жолаушылар көлігі, автомобиль жолдары және тұрғын үй инспекциясы бөлімінің сектор меңгерушісі Жақсыбай Рамазан аталмыш салада атқарылып жатқан жұмыстардың барысы және өзекті мәселелері, «Таза Қазақстан» экологиялық акциясы аясында атқарылып жатқан жұмыстар мен  жылыту маусымының барысы жайлы баяндама жасаса, аудандағы «Жайлы мектеп» Ұлттық жобасы аясында құрылысы жүргізіліп жатқан мектептер мен арендалық үйлердің жай-күйі жайлы аудандық құрылыс, сәулет және қала құрылысы бөлімінің басшысы Мырзабек Абишевтың баяндамасы тыңдалды. Ұсыныс-пікірлер айтылып, қойылған сұрақтарға жауаптар берілді.