Түлкібас: Састөбе кентіндегі қос білім мекемесі ағымдағы жөндеуден өткен

Атап айтсақ, кентке қарасты Макаренко орта мектебі мен Қарлығаш балабақшасы өткен жылы ағымдағы жөндеуден өтіп,  ол жерде көп жылдан бері өзекті мәселенің бірі болып келген мектептің сыртың қаптау жұмыстары толық  іске асса, Қарлығаш балабақшасының тозығы жеткен шатыры жаңартылып, су, электр желісі ауысты.

Қос білім мекемесіне аудан әкімі Аскар Естибаев арнайы барып, қазіргі жай-күйімен танысты.

Ішін және ауласын толық аралап, анықталған кемшілік тұстарын реттеу бойынша жауаптыларды міндеттеп, ондағы тазалық жұмыстарына оң бағасын берді.

Қазіргі таңда 282 бала тәрбие алып жатқан балабақшаны сыйымдылығын 310 балаға дейін кеңейту және сыртын арнайы жабындымен қаптау мәселесі көтерілді.

Аудан әкімі балардың сапалы білім мен тәрбие алу мақсатында айтылған әр бір ұсынысты назарға алып, қолдау көрсететіндігін жеткізіп, жауапты бөлім басшысына тиісті құжаттарды әзірлеуді тапсырды.

Бұдан бөлек, аудан басшысы кент орталығындағы тозығы жеткен аурухананың бүгінгі жағдайын бақылады. Қазіргі таңда аталған медициналық нысанды ағымдағы жөндеуден өткізу мақсатында орталық аурухана тарапынан тиісті құжаттар әзірленуде.