Ақша құйылды, нәтиже жоқ: Түркістан облысы туристерді тарта алмады

Өңірге шетелдіктер қана емес, қазақстандық туристер де қызығушылық танытпай отыр, деп хабарлайды  qaz.ulysmedia.kz

Соңғы екі жылда Түркістан облысына қыруар инвестиция құйылды. Егер 2019 жылға дейін өңірде өнер, ойын-сауық және демалыс саласындағы негізгі капиталға салынған инвестициялар 8 млрд теңгеден аспаса, 2020 жылы бұл сома бірден 125,3 млрд теңгені құрады. Биыл да инвестиция өсімі жалғасуда. Осылайша, 2021 жылдың тоғыз айының қорытындысы бойынша ол 80,8 млрд теңгеге жетті, ал елдің қалған 16 өңірінде инвестицияның жалпы көлемі 86 млрд теңгені құрады. Түркістан облысында қызмет көрсету көрсеткіштері еліміздің көптеген өңірлерінен едәуір төмен. Мысалы, биыл бірінші жартыжылдықта ішкі туризм бойынша қызмет көрсету бойынша көшбасшылар Алматы (447,2 мың адам), Нұр-сұлтан (289,5 мың адам) және Алматы облысы (165,9 мың адам) болды. Бұл ретте Түркістан облысы тек 9-шы орынға ие болды: есепті кезеңмен салыстырсақ бар болғаны 94,7 мың келушіге қызмет көрсетті.  Естеріңізге сала кетейік, Түркістан облысында туризмді дамыту тұжырымдамасы мен Түркістан облысын әлеуметтік-экономикалық дамытудың 2021-2025 жылдарға арналған Кешенді жоспары қабылданды, оған сәйкес өңір үшін дамудың негізгі бағыттарының бірі – туризм. Биыл 10 сәуірде Түркістан қаласында Орталық Азиядағы аса ірі көпфункционалды «Керуен-сарай» туристік кешенінің ашылу салтанаты өтті. Түркістан облысы шетелдік туристер үшін әлі де тартымсыз болып отыр. 6 айда 870 шетелдік туристке қызмет көрсетті — бұл елдегі ең нашар көрсеткіштердің бірі. Мысалы, Алматыда — 54,2 мың, Нұр-Сұлтанда — 34,9 мың, Қостанай облысында – 5,5 мың шетелдік қонақ болған. Жалпы, ел бойынша қаңтар–маусым айларында қонақтарға көрсетілген қызметтер көлемі 44,6 млрд теңгені құрады. Көшбасшылар Алматы (11,2 млрд тг), Нұр-сұлтан (8,3 млрд тг) және Ақмола облысы (4,5 млрд тг) болды. Түркістан облысы, өз кезегінде, тек 9-шы орынға ие болды: барлығы 1,8 млрд теңгеге қызмет көрсетілген.